Þetta var fyrsta verkunarhúsið.  Það var ekki von að nokkrum manni litist á þetta.  Það var helst að heiðursmennirnir Guðmundur Runólfsson og Soffanías Cecilsson kæmu til okkar til að fylgjast með og rifja upp þá tíma sem allt var unnið með höndunum.  Allir aðrir hristu hausinn. Daginn eftir að Soffi keypti húsið, en hann yfirbauð okkur, þá var það rifið.  Þótti okkur fiskvinnslusögu okkar lítill sómi sýndur með því og við hefndum okkar með því að kaupa kött og skíra hann Soffanías Cecilsson.  Ég gat því skammað Soffa eins oft og ég vildi eftir það.  Soffi sagði sjálfur síðar að allir alvöru útgerðarmenn ættu eitt skip skýrt í höfuð sér en hann ætti einungis einn kött, ágætisfallegan þó.

Og þetta var íbúðarhúsnæðið.  Sjálfstæðisflokkurinn keypti það síðar og gerði það upp.  Þarna var gott að búa og ég á góðar minningar frá þessum tíma.

Og hér er séð inn í frumstæðasta fiskvinnsluhús á síðarri hluta síðustu aldar...

Og stundum var allt fullt af fiski og sólarhringarnir náðu saman.  Við seldum flökin suður í fiskvinnslufyrirtæki og komumst þannig undann öllum reglugerðum þar sem innanlendsframleiðsla var undanskilinn öllum reglum á þessum tíma.  Þetta var fyrir daga fiskmarkaða á Breiðafirði og gátum við því fengið fisk á viðráðanlegu verði.  Við áttum ekki einu sinni handtjakk og urðum að bera allt á höndum.

Þetta voru ófá handtök.  Samt var það gríðarlegur munur þegar við höfðum efni á forláta tölvuvog og gátum hent baðviktinni sem við notuðum í upphafi.  Nota Bene þessar myndir eru frá þeim tíma sem við vorum aðeins búnir að þróa okkur!

Myndir segja meira en mörg orð...

Og svo var ráðinn fyrsti starfsmaðurinn, Fanney Gunnarsdóttir en hún flakaði undirmálsfisk af miklum móð.

Og þá er það skipasagan.  Gárungarnir kölluðu þetta skipafélagið Ónýtis - skildi aldrei afhverju...

Fyrsti báturinn var Brynjar SH.  Við leigðum þennan bát af Óla Kalla og gerðum hann út á línu og handfæri.  Þetta urðu ekki síðustu viðskipti okkar því ég seldi honum síðar Sigrúnu SH og keypti af honum Ásakaffi.

Því næst keyptum við Margréti SH og var hún líka gerð út á handfæri og línu.  Þennann bát keyptum við í félagi við Björn Heiðar, en keyptum hann síðar út.

Þá keyptum við Sigrúnu SH, en gerðum hana einnig út á handfæri og línu.  Þetta var stæri bátur og burðarmeiri.  Ósköp var maður eitthvað alvörugefinn ungur skipstjóri.

Því næst keyptum við Viking bát sem hét Stjarnan VE.  Hann gerðum við einungis út á línu en áttum hann stutt.  Var alger dauðagildra sá bátur.  Ég á enga mynd af þeim bát.  Ef einhver lumar á mynd þá vinsamlegast sendið mér.

Þar næst keyptum við 10 tonna stálbát sem hét Hugrún og gerðum hana einungis út á net.  Mig vantar einnig mynd af þeim bát.

Síðasti báturinn sem við eignuðumst var Helga Hafsteins.  Það var alvöru bátur, Gáski 1000, og gerðum við hana út á net.Það er sama með hana ég þarf að leita að mynd af henni einhverstaðar.